天主教永年高級中學知識社群系統 RSS feed provider zh-tw http://163.27.232.7/board.php?courseID=345&f=doclist&folderID=3483 http://163.27.232.7/board.php?courseID=345&f=doc&cid=17669 食人一口，還人一斗梁炯輝　　二千幾年前，當戰國時代，有一丌(e5)叫作馮驩(pang5 huan1)(註一)丌人，因為真散赤(san3 chiah4) (註二)無法度過日，就來遘(kau3)齊國孟嘗君丌門下作客。頭起先，簡單(kan1 ta1)与(hoo7)伊蹛(tua3)傳(thuan5)舍(註三)。十工後，孟嘗君問下骹(e7 kha1)人，人應講：「馮先生真散(san3)，彈劍唱歌，講伊無魚通食(ciah8)。」孟嘗君就与伊蹛較好丌幸舍(註四)，復(koh4)有魚通食。五工後，孟嘗君復問下骹人，人應講：「馮先生復值丌(teh4)彈劍唱歌也，講伊無車通坐。」孟嘗君就与伊蹛復較好丌代舍(註五)，出入有車通坐。五工後，孟嘗君復問下骹人，人應講：「馮先生復值丌彈劍唱歌也，講伊無以為家。」即丌時陣，孟嘗君就真正無歡喜，無愛復插(chap4)伊也啦！　　遘後來，孟嘗君作齊國的宰相，門下客濟(cue7)徦(kah4)無錢通用也，續為著無人有才調去封邑薛城收數(siau3)來值丌煩惱，有人就加(ka7)馮驩推荐与伊。馮驩來遘薛城，有錢丌照數收錢，無錢丌約還錢丌期限，但(na7)是散赤人完全無法度還錢丌，就對契約收來燒了了。孟嘗君真懊惱(au3 nau2)，總是亦無法度伊，人人亦攏扐(liah8)作馮驩無義氣。　　齊王因為孟嘗君名氣傷(siunn1)大，就加伊丌相位廢掉。孟嘗君失勢了後，伊丌門下客攏走了了也，簡單偆(chun1)馮驩無走。孟嘗君無地(teh4)去，只好來遘伊丌封邑，就是薛城安身；無按算，當伊入城丌時，續得著眾百姓大大丌歡迎、阿老敆感謝。彼(hit4)時，孟嘗君纔知影馮驩為伊所作丌載(tai7)志。不但按伊，馮驩入秦國游說秦王聘請孟嘗君作宰相，又復轉來齊國游說齊王回復孟嘗君丌相位，而且与伊復較大丌賞賜。對按伊，孟嘗君無因為一時丌失勢，來拄著殺身丌災厄(e7)，反倒轉得著復較大丌尊榮敆財富，這攏是馮驩丌功勞，亦是馮驩對孟嘗君丌報答。　　值楚漢相爭天下丌時，有一丌叫作韓信丌賢(gau5)人，值(ti7)伊猶(iau2)未發達，當落魄丌時，有一工，因為無通食，來遘溪仔邊飲(lim1)水止飢；實在枵(iau1)徦無力，只好蝹(un1)值丌溪仔邊哼(hainn1)。彼時，有濟濟大母(ta1 boo2) (註六)人當值溪邊洗衫，有一丌軟心丌大母人看伊可憐，就提飯來与韓信食。後來，韓信受封楚王，就用千金來報答即位好心丌大母人。　　頂頭即二丌故事，攏值丌教示咱講：「食人一口(khau2)，還人一斗」丌道理，講較白丌，就是講：「咱人受人恩惠，著知影報答。」這是作人上基本丌道理，亦是人性上有價值(tat8)丌表現。　　現代人丌富裕是古早人無通比丌，對細漢遘大漢，攏是值上好丌環境內面，讀徦真懸(kuan5)丌學歷。照講，應該所八丌道理無較輸古早人，總是咱續常常看著濟濟人彼種精生不如丌言行。　　有丌人為著數想老父丌遺產，大母囝幾丌連合起來，加老母告入官府，講伊偽(gui7)造文書；不但按伊，當媒體丌面前，復出手扑老母，致遘老母差一點也摔(siak4)死。復有一丌少年大母人對美國留學倒轉來，己經碩士畢業也，無好好也報答父母栽培丌恩情，續是想盡辦法偽(gui7)造文書，用父母丌名義，對祖產攏抵押与銀行，然後錢款款丌，走徦無看丌(e1)人影，害父母二人無通食，無通蹛，復愛負(phainn7)還人未了幾也千萬丌債務。　　前幾工，曹家兄弟加老父丌財產分了了，續無嘜(beh4)奉養老父，致遘小弟告兄哥遺(ui5)棄罪。法院開庭，作囝兒丌人不但不知反悔，復對老父大聲嗽(sau3)，惡(onn3)惡嚷。復有一丌博士老父真賢飼囝，不但栽培幾丌囡仔攏提著博士丌學位，家產亦攏分与囡仔也，与伊丌囡仔個個攏找(che7)著好頭路，生活亦攏真好過。無按算，最近，當博士爸失業，無錢過日子，叫後生隨人按月仔寄二百美金与伊所費，竟然無人嘜插(chap4)伊。自按伊，致遘博士爸告伊許也(hiah4)丌博士後生遺棄罪。者也(ciah4)丌人敢講敆古早人無共，亦已經「進化」遘不是人也？是怎樣完全無帶念著老父老母車養大漢丌恩情，值父母年老無法度趁(than3)食丌時，不但無嘜(beh4)奉養，而且復想盡辦法，對財產搶了了，致遘父母連食飯都無。　　阮竇(tau1)有飼二隻流浪狗，當初(che1)時，看著彼隻狗枵餓無通食丌可憐款，阮就提凊(ching3)飯(註七)与伊食。從此以後，伊就顧值阮竇(tau1)門骹口，若有生(chinn1)分人倚(ua2)近，伊就吠徦阮出來；第二隻亦是按伊。我心內實在感慨，是怎樣人讀冊讀徦一牛車，与父母車養徦大漢，父母丌所費敢裁(kiam2 chai2) (註八)都不但(ciann5)千萬，亦伊丌報答續是復告復扑老母，詈(lue2)罵老父，出賣父母，復与人告講遺棄罪；連對待恩情大徦若天丌父母都是按伊，復較免講伊嘜怎樣來對待別人也啦！狗食人一喙(chui3)，都知影報人丌恩情，用伊丌身軀來抵擋外來丌危(gui5)險；現代人生活丌享受，是古早人所無丌，敢講續連狗都不如呢！【註解】馮驩：「驩」字別丌版本作「諼」字音誤作[suan1]。散赤：無錢過日丌家境。傳舍：是下等客所蹛丌房宮。幸舍：是中等客所蹛丌房宮。代舍：是上等客所蹛丌房宮。大母：女性丌尊稱，現代音變作[ca1 boo2]，外語族無了解，續當作賤稱來用。凊飯：正頓食偆已經冷去丌飯菜。敢裁：可能，或者是丌意思。（本文減字版刊於臺灣教會公報2003年6月15日第2676期〈鄉土心情〉） 2025-11-07 18:06:01GMT